KUELEKEA MAADHIMISHO YA SIKU YA WATOTO DUNIANI,BARAZA LA WATOTO LATAKA USIMAMIZI THABITI WA HAKI ZA WATOTO NCHINI.

KUELEKEA MAADHIMISHO YA SIKU YA WATOTO DUNIANI,BARAZA LA WATOTO KINONDONI LATAKA USIMAMIZI THABITI WA HAKI ZA WATOTO NCHINI.

viongozi mbalimbali wa baraza la watoto,manispaa ya Kinondoni wakizungumza na waandishi wa habari jijini Dar es slaam juu ya maadhimisho ya siku ya watoto duniani yanayofanyika kote duniani NOVEMBA 20 ya kila mwaka

 

Na mwandishi wetu,Dar es salaam

Kuelekea maadhimisho ya kimataifa ya siku ya watoto duniani ambayo huadhimishwa Novemba 20 kila mwaka,baraza la watoto manispaa ya Kinondoni limeipongeza serikali ya Jamuhuri ya muungano wa Tanzania kwa juhudi kubwa inayofanyika katika kuhakikisha watoto wanapata elimu,huduma za afya,pamoja na kuweka mifumo mbalimbali ya ushirikishwaji wa watoto kama vile mabaraza ya watoto.

Wakizungumza na waandishi wa habari leo Novemba 19,2022 katika ofisi za shirika la Save the Childrens Tanzania, jijini Dar es salaam viongozi mbalimbali wa baraza hilo wamesema kuwa hatua ya serikali kutunga sera na miongozo mbalimbali ya kulinda na kusimamia haki za watoto kama vile sheria na sera ya mtoto na hivi karibuni muongozo wa uanzishwaji wa madawati ya ulinzi wa watoto ndani na nje ya shule ni hatua ya kupongezwa itakayochochea kuwepo kwa haki za watoto.

Mwenyekiti wa baraza hilo la watoto wa manispaa ya Kinondoni,Rahabu Fransis amesema kuwa pomoja na kwamba Tanzania imesaini mikataba ya kimataifa inayoitaka kulinda haki ya watoto,bado sheria ya ndoa ya mwaka 1971 inayoruhusu watoto kuolewa chini ya miaka 18 huku michakato ya urekebishaji wa sheria hiyo ikiwa mingi na mirefu na kuwaacha watoto wa kike wakiendelea kuumia,hivyo baraza hilo linaihimiza serikali kuharakisha mabadiliko ya sheria hiyo ya ndoa ili kulinda watoto,hasa wa kike hapa nchini.

"vile vile tunaiomba serikali iweke miundombinu rafiki itakayowawezesha watoto hasa wenye ulemavu kupata elimu,Hii ni pamoja na kujenga madarasa ya kutosha,madawati,kufunza walimu wa elimu maalum na kuweka mifumo ya usaidizi itakayowezesha elimu sawa kwa wote." amesema Rahabu

Mwenyekiti wa baraza la watoto,manispaa ya Kinondoni Rahabu Fransis akizungumza na waandishi wa habari jijini Dar es slaam juu ya maadhimisho ya siku ya watoto duniani yanayofanyika kote duniani NOVEMBA 20 ya kila mwaka

 

Kwa upande wake Sabrina Juma Salum ambaye ni kiongozi wa nidhamu kwa watoto wa kike wa baraza hilo la watoto manispaa ya Kinondoni amesema kuwa licha ya serikali ya Jamuhuri ya muungano wa Tanzania kupitia Rais Samia Suluhu Hassan kutoa muongozo wa kurudi shule  hasa kwa wanafunzi walioacha masomo kutokana na kupata ujauzito bado inahitajika serikali na wadau mbalimbali kutoa elimu juu ya muongozo huo ili watoto hao waweze kusaidiwa kurudi mashuleni.

Amesema kuwa  serikali iweke mazingira mazuri ya watoto wanaopata ujauzito kurudi katika mfumo rasmi wa masomo ikiwa ni pamoja na kuweka mifumo mashuleni ya utoaji ushauri nasaha,na kutoa kwa jamii ili iweze kutambua kuwa mtoto anayepata ujauzito bado ni mtoto na ana haki ya kuendelea na masomo.

 

Kuhusu masuala ya unyanyasaji na ukatili dhidi ya watoto,katibu wa baraza hilo la watoto Miraji Idrisa amesema kuwa vitendo hivyo vinavyofanywa dhidi ya watoto,majumbani,kwenye jamii na mashuleni ikiwemo kupigwa,ubakaji,matusi,kutelekezwa na kutengwa vimewaathiri watoto kimwili na kisaikolojia pamoja na kuathiri ustawi wa watoto ,hivyo ameiomba serikali kuchukua hatua kali kwa watakaobainika kufanya vitendo hivyo  na kama watoto watakuwa tayari kutoa taarifa pale watakapoona vitendo hivyo vikifanyika.

Katibu wa baraza la watoto,manispaa ya Kinondoni Miraji IDRISA akizungumza na waandishi wa habari jijini Dar es slaam juu ya maadhimisho ya siku ya watoto duniani yanayofanyika kote duniani NOVEMBA 20 ya kila mwaka

 

 

Kuhusu mabadiliko ya tabia ya nchi 

,Sadiki H Sadiki ambaye ni afisa habari wa baraza hilo la watoto amesema kuwa majanga yatokanayo na mabadiliko hayo yamekuwa yakiwaathiri watoto.

 

"Sisi kama watoto tayari tumeona mabadiliko ya tabia ya nchi yakituathiri,kwa mfano sasa jukumu la kutafuta maji ambalo linatokana na ukame wa muda mrefu kwa kiasi kikubwa limewekwa kwa watoto hasa wa kike na hivyo kupunguza muda wa kujifunza na kupumzika pia ukosefu wa chakula unaosababishwa na majanga ya tabia ya nchi kama ukame na mafuriko inatufanya kushindwa kukaa shuleni kwa utulivu kujisomea na badala yake tunashiriki katika shughuli za nyumbani za kutafuta kipato ambapo wazazi wengine huozesha watoto wa kike ili kupata mali na kupunguza mzigo wa malezi"amesema Sadiki.

Hata hivyo baraza hilo la watoto wa manispaa ya Kinondoni kupitia Makamu mwenyekiti wake,Saraphyner Frank limemkumbusha Rais Samia Suluhu Hassan,wadau na serikali kwa ujumla kuwashirikisha watoto upangaji wa bajeti,utungaji wa sera na mipango ya serikali kwa ujumla ili watoto waone nao wana umuhimu katika mambo yanayohusu ustawi na makuzi yao hapa nchini.

 

Maadhimisho ya kimataifa ya siku ya watoto duniani yenye kauli mbiu isemayo "Ushiriki na usawa kwa kila mtoto" yanafanyika kesho ulimwenguni kote ambapo shirika la Save the Childrens Tanzania linaamini kuwa kama serikali itaharakisha marekebisho ya sheria ya ndoa hatua hiyo itachochea watoto wa kike kuwa salama,pamoja na kupitia sheria ya elimu na kanuni zake ikiwemo kuondoa adhabu kali mashuleni kwa kutafuta njia nyingine mbadala za kuendeleza nidhamu mashuleni,shirika hilo litakuwa tayari kusimamia jambo hilo la uondolewaji wa adhabu kali mashuleni kwa kutoa mafunzo.