DC ILALA AFUNGUA MKUTANO MKUU WA AQRB,ASISITIZA UZALENDO KWA WABUNIFU MAJENGO

 Na PrayGod Thadei 

Mkuu wa wilaya ya Ilala Mhe Edward Mpogolo amesema Wabunifu wa Majengo na wakadiriaji Majenzi ni watu muhimu kwenye kujenga uchumi wa nchi hivyo wanapaswa kuwa wazalendo ili kuendelea kuikuza sekta hiyo

Mkuu huyo wa Wilaya ya Ilala, ameyasema hayo Leo Oktoba 29,2024 jijini Dar es salaam   Katika ufunguzi wa mkutano mkuu wa 5 wa mwaka wa  bodi ya Usajili wa Wabunifu Majengo na wakadiriaji majenzi(AQRB) ambapo alimwakilisha Naibu Waziri Mkuu na Waziri wa Nishati, Dkt. Dotto Mashaka Biteko. 

Hii ilikuwa ni siku muhimu kwa wabunifu wa majengo na wakadiriaji majenzi waliokusanyika kwa mkutano wa tano wa Bodi yao.

Mpogolo alianza hotuba yake kwa kutoa wito wa uzalendo. “Tunawategemea ninyi katika kuhakikisha miradi ya ujenzi unatekelezwa kwa weledi na kwa wakati. Serikali imewaamini na kuwapeni majukumu haya nyeti, hivyo ni muhimu kuwa wazalendo na kufanya kazi kwa uadilifu,” alisema kwa msisitizo.

Alionya kwamba baadhi ya wataalamu wamekuwa wakijali maslahi binafsi zaidi, wakichukua miradi mikubwa na kukimbilia kupata faida ya haraka. Kitendo hiki kimekuwa kikichangia majengo kujengwa chini ya kiwango, hali inayohatarisha maisha ya watu na kudhoofisha sekta ya ujenzi nchini. “Ni wakati wa kubadilika,” alihimiza Mpogolo.

Akiongeza umuhimu wa mabadiliko, alisema kuwa serikali ipo kwenye mchakato wa kuboresha sera ya ujenzi na kuanzisha sheria itakayosaidia wataalamu wa sekta hiyo kuendana na kasi ya mabadiliko ya teknolojia ulimwenguni. “Ni kwa kushirikiana kwenu, mafanikio haya tunayoyaona sasa yamewezekana. Nawaomba muunge mkono jitihada za Rais wetu, Dkt. Samia Suluhu Hassan, kwa kuwa wazalendo,” alisema kwa matumaini.

Katika hali ya kuunga mkono hotuba ya Mpogolo, Dkt. Daudi Kondoro, mwakilishi wa Katibu Mkuu wa Wizara ya Ujenzi na Mkurugenzi Mkuu wa Wakala wa Majengo Tanzania (TBA), alitangaza mpango wa wizara wa kuwekeza katika mafunzo ya kitaalamu ili kuwajengea uwezo wataalam waliopo nchini.

"Kila mwaka tutatoa mafunzo kwa wataalamu 180 katika ubunifu na ukadiriaji wa majenzi ili kuongeza weledi kwenye taaluma hii. Hii itawezesha nchi yetu kuwa na wataalamu mahiri wenye ujuzi na maarifa yanayohitajika,” alisema Dkt. Kondoro kwa furaha.

Siku hiyo haikuishia hapo, kwani mkutano huu ulipambwa na sherehe za mahafali ya kwanza ya wahitimu wa taaluma ya ubunifu wa majengo na ukadiriaji majenzi. Zaidi ya wahitimu 130 walitunukiwa vyeti na mgeni rasmi, tukio lililowajaza furaha na matumaini ya mustakabali bora katika taaluma yao.

Dkt. Ludigija Bulamile, Mwenyekiti wa Bodi ya Wakurugenzi wa Bodi ya Wabunifu wa Majengo na Wakadiriaji Majenzi, alifunga siku hiyo kwa kusema kuwa kwa sasa bodi hiyo imefanikiwa kusajili wataalamu 1586, huku 33 kati yao wakiwa ni wageni kutoka nje ya nchi. Aliahidi kuendelea kushirikiana na serikali na wadau mbalimbali ili kuhakikisha kuwa taaluma hiyo inazidi kukua na kuimarika.

Kufanyika kwa mkutano huo ni ishara ya mafanikio makubwa na ni siku iliyojaza matumaini na changamoto mpya kwa wataalamu wa majengo nchini Tanzania. ambapo Wote waliotoka kwenye mkutano huo walionekana kutafakari maneno ya uzalendo na weledi yaliyosisitizwa, wakiweka ahadi ya kufanya kazi kwa uadilifu na ubora kwa mustakabali wa sekta ya ujenzi nchini