NIDA Yatangaza kupata Kibali Maalum Kurekebisha Taarifa Kwa Walioghushi Ili Kujisajili,yawaita kurekebisha taarifa

 

NIDA Yatangaza kupata Kibali Maalum Kurekebisha Taarifa Kwa Walioghushi Ili Kujisajili

NA MWANDISHI WETU

MAMLAKA ya Vitambulisho vya Taifa (NIDA) imesema serikali imetoa kibali maalum kwa ajili ya kushughulikia maombi ya mabadiliko ya taarifa kwa watu waliotumia nyaraka za kughushi au waliotoa taarifa za udanganyifu wakati walipojisajili kwa Mamlaka hiyo.

Imesema kibali hicho kimetolewa kwa muda maalum wa mwaka mmoja, na kwamba watu wenye changamoto hizo wanapaswa kujitokeza na kwenda katika ofisi za NIDA za wilaya wakiwa na viambatanisho vinavyotakiwa ili kufanikisha marekebisho ya taarifa zao ndani ya muda uliopangwa.

Mkurugenzi Mkuu wa NIDA, James Kaji, amesema hayo jijini Dar es Salaam wakati akizungumza na waandishi wa habari, na kuongeza kuwa kibali hicho kinahusisha makundi mbalimbali ikiwemo waathirika wa matumizi ya vyeti vya kughushi, waliowahi kufukuzwa kwenye ajira za serikali kutokana na kutumia vyeti vya shule visivyo halali, na ambao pia walitumia vyeti hivyo kujisajili NIDA.

Kaji amesema: “Makundi yote yaliyowahi kutumia vyeti vya kughushi au taarifa zisizo sahihi sasa yanaruhusiwa kurekebisha taarifa zao kupitia kibali hiki maalum.”

Imesema kundi lingine ni watu waliotumia majina ya watu wengine kupata elimu, watu waliotoa taarifa za uongo au udanganyifu wakati wa usajili wa NIDA, pamoja na raia wa Tanzania waliojisajili kama wakimbizi.

Kaji amewataka wananchi wa makundi hayo kufika katika ofisi za NIDA za wilaya wakiwa na nyaraka zote zinazohitajika ili maombi yao ya mabadiliko ya taarifa yashughulikiwe kama inavyotakiwa.

“Tafadhali fika na nyaraka zote muhimu ili tuweze kushughulikia maombi yenu kwa usahihi,” amesema Kaji.

Amesema watu hao watalazimika kuwa na viambatanisho vya lazima pamoja na vya ziada kama watakavyoelekezwa na wataalamu wa NIDA.

Amevitaja viambatanisho hivyo kuwa ni pamoja na nakala za vyeti halisi vya elimu, cheti cha kuzaliwa kilichohakikiwa na RITA, tamko la kiapo (Deep Pool) lililosajiliwa kwenye gazeti la serikali, pamoja na nyaraka nyingine ambazo ofisi za NIDA zitaelekeza kulingana na mahitaji.

“Viambatanisho kama vyeti halisi, cheti cha kuzaliwa cha RITA na tamko la kiapo ni vya lazima,” alifafanua.

Amesema maombi yatakayofanyiwa kazi ni yale pekee yatakayokidhi masharti na vigezo vilivyowekwa baada ya wahusika kuwasilisha nyaraka zote zinazotakiwa kwa madhumuni ya kuthibitisha taarifa halisi.

Aidha, Mamlaka hiyo imesisitiza kuwa kwa kuwa kibali hicho kimetolewa kwa muda maalum, ni muhimu kwa wote wenye changamoto za taarifa kujitokeza mapema na kufika katika ofisi za NIDA za wilaya wakiwa na viambatanisho vinavyotakiwa ili kufanyiwa marekebisho ndani ya muda uliopangwa.

“Kwa kuwa muda ni maalum na mfupi, tunawaomba wananchi wajitokeze mapema,” imeeleza NIDA.

Kadhalika, imewaomba wananchi kutoa taarifa sahihi na za kweli wanapojisajili NIDA kwa ajili ya utambulisho wa taifa, kwa kuwa kutoa taarifa zisizo sahihi au kufanya udanganyifu wakati wa usajili ni kosa kwa mujibu wa sheria ya Usajili na Utambuzi wa Watu.

“Toeni taarifa sahihi. Udanganyifu ni kosa kisheria,” imesisitiza Mamlaka.