TANESCO YAZINDUA RASMI MITA JANJA NCHI NZIMA, YAAHIDI KUDHIBITI WIZI WA UMEME

  TANESCO YAZINDUA RASMI MITA JANJA NCHI NZIMA, YAAHIDI KUDHIBITI WIZI WA UMEME

DAR ES SALAAM, Tanzania – Shirika la Umeme Tanzania (TANESCO) leo Ijumaa, Disemba 5, 2025, limezindua rasmi mfumo mpya wa kisasa wa matumizi ya mita janja (smart meters) za umeme, hatua inayolenga kuleta mapinduzi makubwa katika usimamizi wa nishati na kudhibiti upotevu wa mapato ya shirika hilo.

Uzinduzi huo wa kihistoria umefanyika katika Ukumbi wa Kimataifa wa Mikutano wa Julius Nyerere (JNICC) jijini Dar es Salaam, na kuhudhuriwa na wadau mbalimbali wakiongozwa na Mgeni Rasmi, Waziri wa Nishati, Mhe. Deogratius Ndejembi.

Akizungumza wakati wa uzinduzi huo, Waziri Ndejembi ameeleza kuwa ujio wa mita janja ni matokeo ya uwekezaji mkubwa uliofanywa na Serikali katika sekta ya nishati, ikiwemo kukamilika kwa mradi wa kufua umeme wa Julius Nyerere (JNHPP), ambao sasa umehakikisha upatikanaji wa umeme wa kutosha nchini.

"Mita hizi janja sio tu mabadiliko ya teknolojia, bali ni silaha muhimu katika vita yetu dhidi ya wizi wa umeme unaolisababishia shirika hasara kubwa," alisema Mhe. Ndejembi. "Tunataka kuhakikisha kila umeme unaozalishwa unatumika kihalali na kulipiwa, na mita hizi zitaturahisishia sana kazi hiyo kwa kuripoti tukio lolote la uchezeaji wa mita papo hapo."

Waziri Ndejembi alitumia fursa hiyo kutoa tahadhari kwa wananchi kutokubali kununua mita hizo kutoka kwa watu binafsi au taasisi zisizokuwa rasmi, akisisitiza kuwa usambazaji na ufungaji unafanywa na TANESCO pekee. Aidha, alilitaka shirika hilo kutoa elimu ya kutosha kwa umma kuhusu matumizi ya mfumo mpya ili kuepusha usumbufu.

Kwa upande wake, Mkurugenzi Mtendaji wa TANESCO, Bw. Lazaro Twange, alisema mita janja zitarahisisha maisha ya wateja kwa kuondoa ulazima wa kuingiza tokeni ndefu, badala yake mteja atanunua umeme na tokeni kuingia moja kwa moja kwenye mita.

"Tumekamilisha majaribio ya mita elfu 13 na wateja wamefurahia mfumo huu. Kama shirika, tumejipanga kufunga mita mpya 200,000 kwa wateja wetu katika awamu ya kwanza ya utekelezaji wa mpango huu mpana," alisema Bw. Twange.

Uzinduzi huu unaashiria hatua kubwa kwa Tanzania katika kuelekea matumizi ya nishati safi na ya kisasa, na kuimarisha miundombinu ya nishati ili kuendana na kasi ya ukuaji wa uchumi wa nchi.

Wananchi wanaweza kupata maelezo zaidi kuhusu huduma za TANESCO na kufanya maombi ya umeme kupitia jukwaa la mtandaoni la NIKONEKT.